Alamutakanu

Ishinikateu CREB atusseun ka mamu-atussetau kananatuapitshitshetau-katshishkutamatshetau mishta-tshishkutamatsheutshuapihtsh Shekutamitsh nelu atusseshtamuatsh nehi kau e ilniumakatsh katshi eitapishtakanitsh nutshimatsh.

Etatu nishulnueuatsh kananatuapitshitshetau katshishkutamatshetau ka ish atussetau nite (CREB) mishta-tshishkutamatsheutshuapihtsh Shekutamitsh kie nanaku ishinakunilu utshisselitamunuau nelu tshitapatamuatsh kau e ilniumakatsh katshi eitapashtakanitsh nutshimatsh.

Mitshetshuatsh e nashtuapatakanilitsh kananatuapitshitshetau utshisselitamunuau nite (CREB). Tshitapatamuatsh eish ueueshtakanitsh milu-atusseun e minashkuatsh, tshetshi eka nipimakatsh assi, kutak tshekuan eitapishtakanitsh nutshimatsh, e uitishiuet mishue assihtsh ka miluatsh pimi, assi kie atamassihtsh milu-atusseun, ka mamu-ilniutau aueshishatsh nipihtsh mahk atamipekuatsh, milakatsh apishtakanitsh nutshimatsh kashikatsh mahk aishkatsh, iakua tutakanitsh ne ka mishkutshapalitsh tshishik^u, katakatsh-assi mitshim mahk etashakuatsh kie ishinakuatsh nipi nutshimatsh.

Katshishkutamatshetau, kananatuapitshitshetau mahk katshishkutamuakanitau ka takunilitsh utapunuau nite CREB mitshenalu e nashakau atusseunilu ne ka nanitu nashtunakau nutshimiu-natukulin, aiatsh tshetshi milu-nashtunakau ilniun, ka miluatsh pimi mahk aiatsh e uinakuatsh tshishik^u, nashamuatsh ne ka ishinakuatsh ka ilniumakatsh mahk ilniun nutshimatsh mahk nite ka shipiatsh Shekutamitahtsh, nameshatsh ka tshishpeuatakanitau, Pimi ka miluatsh atusseun mahk Atusseutshuapa ka mamuhitutau ka nashakau e pashtinakanitau mishtikuatsh.

Ui tutamuatsh tshetshi uanasse nanatuapitshitshanuatsh-atusseun eukuan uetsh mamupitau kupanieuatsh nite CREB atusseun. Tahta pipuna tutamuatsh tshetshi milupalilitsh umamu-atusseunuau mishue mishta-tshishkutamatsheutshuapa, tshishe-tshimautahtsh mahk atusseutshuapa. Eish mamu-atussanuatsh eukuan ne e tshishapalitsh tshetshi nashtunakanakau minashkuatsh e ishinakuatsh mahk ashu-miluanuatsh tshisselitamuna.

CREB atusseun tshimatapanitsh Kanashakau minashkuatsh kananatuapitshitshetau-atusseunilu tshetshi mamuhitutau kassinu kupanieuatsh mahk nitshenatsh ka tatau nutshimatsh tshetshi uihtakau tanite mahk tan tshe eish mashituepalitatau atusseunilu tshetshi eshk tshi apashtakanitsh kassinu ka ilniumikatsh assihtsh.

Takuan minashkuatsh ka nanatuapitshitshanuatsh shuliau atusseun kie CREB nikan ashtauatsh tshetshi uitsheuatau nitshenatsh kamishta-tshishkutamuakanitau mahk katshish-mishta-tshishkutamuakanitau.